本文目的係希望做一個簡介畀一啲希望自己建立網站嘅人一啲心得. 你當筆記又好,你當笑話睇又好,希望後來者可以順順利利走少啲冤枉路 !
你可能話,傻佬!上網睇片咪得囉,使乜浪費時間去摸索咁多呀?如果你連基本概念都冇,你點樣搵到啱嘅嘢睇呀 ? 網上面好多都係短片嚟㗎咋 ! 碎片化,根本畀唔到整體概念,反而今次我搵到一條西片,兩個鐘就真係比較實用.
最後補充返一句,拍片多數都係畀完美結局你睇,好少畀痛苦過程你睇, 好多時你落手落腳做就會出現好多片入面冇嘅問題. 但有片總好過冇 !
故事背景
故事開始係20年10月底, 之前我完全對建立網站毫無概念之下, 開始膽粗粗地建立個人網上商店,當時我記起有位朋友係做呢一行希望在佢指導之下,我可以一星期內完成任務. 當然我可以請專業人士建立網站但係自己落手落腳,中間過程可以學到好多嘢,另一原意係假如日後維護網站或修改內容都有一個大概念.唔使下下叫人做.但如果你對電腦毫無認識而且又想希望快啲建立網店你都係畀錢請人搞好過.
起步時非常順利, 經我朋友介紹之下由外國網站 http://namecheap.com 買到domain name,訂購host server,所有使費都比香港價錢平一半以上. 其實我有睇網友留言, 香港好多host service都有好多細節問題! 反正都係試就由平價嘅host service開始建立網站, 反正損失唔會太大.
依家好多外國hosting公司都已經搬咗嚟香港, 出名嘅都直接開咗分公司喺上海. 相信有競爭就有進步香港hosting價錢同服務都會提升返.
建網站過程
最容易嘅方法建立網站就係用wordpress, host已經有wordpress setting, 過程都唔使十分鐘, 跟住就係決定網頁主題, 外國 http://themeforest.net內有好多主題可以揀,價錢又唔貴. 當時就買咗一個新款又靚嘅主題, 因為係單頁所以所花的時間唔多, 修改下主題內容就可以將個網頁公佈天下 ! 簡簡單單毫無難度完成第一任務, 信心加強 !
因為server可以開sub domain, 咁下一步就當然試下開網店,今次用wordpress裏面woocommerce架構網店, 過程同上面一樣好快就開張大吉, 跟住開始加內容,因為完全冇經驗所以個主題以英文為主呢個係一個最大嘅伏!之後問題就出現,後面再講.
好開心地不斷加不同產品內容,嗰時又唔知woocommerce分類,乜嘢叫tag,有什麼功能總之乜都唔知,最緊要快,快手加曬所有產品內容,加產品內容過程都搞咗成個星期.
供應商問題
另一樣嘢學到就係搵供應商,有時候你要睇供應商有冇經驗,佢提供嘅資料唔豐富或者亂七八糟,你又要花好多時間執頭執尾, 或者要搵其他資料補充返,假如你賣產品週期性長,你呢個過程都係一次過, 可能一年後再修改內容.但係如果你賣嘅產品週期性短咁以後你就會十分之忙,係一份正職marketing長工.
做網頁內容時候有時候要分牌子或者產品類別,嗰時就知道分類tab嘅重要性, 咁當然兜返轉頭花時間修改產品類別同埋細心分類.不過呢啲都係小事啫,最多係用多一日搞掂. 經驗教訓係每個產品一定用自己方法分類,供應商嘅分類名稱未必啱你,如果你有十幾個供應商個個分類方法唔同名稱唔同,你按住佢哋咁做你就會好亂,所以一定要自己有系統建立一個分類方法.
Plug-in問題
加完產品,以為好簡單乜都唔使搞就可以開鋪,誰不知wordpress只係一個免費嘅殼,如果你要加功能你就要買plug-in.就正如你租咗間舖你都要裝修(theme)然後買個收銀機,諸如此類, plug-in加下一件又一件,大多數plug-in基本功能都係免費,但如果你想用多啲功能你就要畀錢買高級版.每件plug-in睇落好平,但加加下超乎我想像咁多錢. 四五個plug-in慳慳地都要買, 唔買得唔得? 你估人哋傻?每兩個星期就有update, 有啲plug-in係按年收費. 你試下唔畀囉 ! 新舊版唔同plug-in可以撞到七彩或者慢到七彩.
就算你畀錢人幫你搞掂網站, 定係自己做. 一定要問清楚plug-in 升級費用點樣計.
可能人哋會收每年維護費, 呢個就係plug-in升級費用.
本身wordpress概念係幾好嘅,你要乜你自己買,但係太多濕碎plug-in,結果洗費冇得計畫或者會令到網站好慢. wordpress只不過係製造一個programming產業
交易系統用strip.com. 過程簡單同埋資金回籠快. 唯一可以話差嘅係手續費貴. 如果做細金額生意, 最好比較一下其他支付系統. 開網店最好係可以收信用卡, 如果要客人用payme你就會流失客. 記住消費係即興,如果又要去銀行入數然後又畀入數紙你咁麻煩,客人一定走.
開張大吉 – 變大鑊 !
測試一切順利, 好啦 ! 網店開張, 跟住有客人落第一張單, 非常開心, 跟住我馬上入數, 將所有費用輸入quickbooks.我去strip.com 睇見手續費係千幾, 諗住有冇食水咁深呀, 只係二千蚊單,再睇多次, 收入係兩萬幾, 原來買賣貨幣係英磅, 馬上去後台睇原來woocommerce基本設定英磅, 因為之前測試主要係睇api有冇問題, 而且唔會實際反映喺帳單上, 所以貨幣單位冇留意. 咁, 馬上做refund, 但係手續費就硬食. 未見官已打三十大板, 第一張單做埋都未夠畀手續費.
開始有概念如何運作網店
網店初期當然係朋友支持嚟買嘢,就正如實體店開張你朋友都會送個花牌畀你!
不過,一個月後有朋友話唔識英文冇辦法入嚟買嘢,希望我有中文介面 ! 要中文冇問題買plug-in翻譯中文,跟住就嚟料啦 ! 個網頁越嚟越慢.
如果你係一個陌生人初次入一個網站要等40秒先完全load完,你都一定一早掉頭走,分分鐘load五秒都嫌多.
https://gtmetrix.com/ 測試網站尋找問題,跟住就要減plug-in,希望可以加快網頁運作.但效果好差.
跟住碰到另一問題就係冇乜人知你存在, 好啦賣廣告囉, 咁去facebook 建立廣告帳戶, 喺facebook開business manager, 開post然後落廣告, 今次醒目咗, 上網睇片點樣喺facebook落廣告, 開頭落廣告係介紹個post, 呢個係錯誤嘅方法. 你個post只係喺人哋facebook內閃過, 冇人會走入嚟睇你個post浪費金錢.
OK! 再搵其他片睇, 學真正落廣告係要人走入去網站先計費用,當然廣告費亦都會高啲. 冇問題,如果真係有人買嘢有乜所謂呀! 畀貴啲廣告費, 開始有人入嚟但可能太慢冇人買嘢轉頭就走, 個教訓係先做好基本嘢先然後先去做廣告, 否則浪費金錢
跟住又睇片去解決問題, 測試網頁嘅速度原來係網站反應太慢, 因為我用嘅plan係平價plan, Server share plan – 同人分享server所以有啲時段速度好慢, 呢個係死症冇辦法修改. OK! 改plan囉, 開過另一個plan係專門做wordpress server, 轉咗過去速度快咗, 但因為翻譯plug-in拖累網頁轉數, 然後深入研究, 個主題因為太靚仔, 所以反而令到網頁出現太忙太慢.
搬屋搬寫字樓
人哋改plan係幾分鐘嘅事,但係我又中招 ! 原先諗住同一間公司改plan係好容易, 原來server唔同, 所以要將原先server內容搬去另一個server度. 因為網站data已經超過500mb, 結果又要買plug-in同步資料.
原先舊server係可以開sub-domain, 網店係建立sub-domain之上. 新server係唔可以開sub-domain, 根本買plan嘅時候冇辦法將所有條件一條一條對, 結果又中伏 !
我唔係話所有IT公司都係呃人,但係你冇經歷過你就唔會知道咁多細節, 隨時會中招. 好彩我網站只不過係初期, 客戶好少. 當我面對唔同問題嘅時候影響冇咁大. 但係如果你做咗一排網店, 然後將要擴充或者修改, 你最好睇完呢篇文. 因為網上唔會講咁多問題畀你知 !
你可能話一早畀錢,咪解決曬所有問題囉 ! 你第時可能會擴充㗎嘛, 我依家嘅問題你將來都會面對㗎 ! 到時你又話人哋呃你 ! 點解收咁多錢 ? 點解要咁麻煩 ? 點解要咁耐時間 ? 點解? 點解 ? 好多個點解. 依家你早啲知, 你心裏有準備, 人哋唔係呃你, 過程真係好複雜, 自己做過自己知 ! 我依家當交學費, 總好過日後更大損失!
文章不斷更新……
